EuskaraBilboko campusa

Maila hau amaitzean, ikaslea gai izango da eguneroko harremanetako hitz eta esamolde errazak ulertzeko eta erabiltzeko, berehalako beharrizanei aurre egin ahal izateko (bere burua eta beste batzuk aurkezteko, helbidea adierazteko, objektu eta pertsona ezagunei buruzko oinarrizko informazioa eskaintzeko).

A1 erabiltzaile hasberriaren maila lortzeko, guztira 125 eskola-ordu behar direla aurreikusten da, ikaslearen hasierako maila zein den kontuan hartuta, eta 75 ordu inguru beharko ditu ikasleak ikaskuntza pertsonal eta hizkuntzaren erabilera autonomoa lantzeko.

Maila hau amaitzean, objektuen eta pertsonen deskribapenak egin eta ulertuko ditu ikasleak, eta azalpen laburrak egin ahal izango ditu beste hiztun batzuekin (lagunak, senideak, lankideak etab.) zuzenean harremanetan jartzean, bizipen pertsonalei buruzko informazioa trukatzen bada: norberari, familiari, erosketei, toki interesgarriei, lanbideei buruzko oinarrizko informazioa.

A2 oinarrizko erabiltzailearen maila lortzeko, guztira 200 eskola-ordu behar direla aurreikusten da, beti ere A1 mailatik hasita, eta 100 ordu inguru beharko ditu ikasleak ikaskuntza pertsonal eta hizkuntzaren erabilera autonomoa lantzeko. 

Maila hau amaitzean, ikaslea gai izango da hizkuntza maila bereko hiztunekin solasaldiak izateko testuinguru ezagunetan, beti ere gai orokor eta ohikoei buruz, eta helburua informazioa trukatzea izango da. Berdintsu, gai izango da lagunei, senideei eta ikaskideei edo lankideei instrukzioak emateko; objektuen deskripzio txikiak ere egin ahal izango ditu, baita gertakariak labur-labur kontatu ere. Iritzi eta asmoen berri ere eman ahal izango du labur.

B1 erabiltzaile independentearen maila lortzeko, guztira 250 eskola-ordu behar direla aurreikusten da, beti ere A2 mailatik hasita, eta 150 ordu inguru beharko ditu ikasleak ikaskuntza pertsonal eta hizkuntzaren erabilera autonomoa lantzeko. 

Maila honen amaieran, ikaslea gai izango da gai orokor eta abstraktuei buruzko testurik gehienak ulertzeko, bai elkarreragin zuzenetan, bai komunikabideen bitartekoetan, eta ideia nagusiak eta bigarren mailakoak bereizi ahal izango ditu. Era berean, eguneroko testuinguruetan, gai izango da adiskideekin, lankideekin eta euskaldunekin jarioz hitz egiteko, informazioa emateko, iritzia eskatzeko, ikuspuntua defenditzeko, etab. Erraztasunez eta eraginkortasunez arituko da, transmititu nahi den informazioaren alderdi esanguratsuak eta xehetasunak desberdinduz.

B2 erabiltzaile aurreratuaren maila lortzeko, guztira 350 eskola-ordu behar direla aurreikusten da, beti ere B1 mailatik hasita, eta 250 ordu inguru beharko ditu ikasleak ikaskuntza pertsonal eta hizkuntzaren erabilera autonomoa lantzeko. 

Maila honen amaieran, ikaslea gai izango da era guztietako testuak ulertzeko: esparru hurbileko, laneko edo komunikabideetako elkarrizketak, eztabaidak eta azalpenak, baita inguruko euskalkian adierazitakoak ere. Ekoizpen mailan, hizkera arrunteko eta lan esparrukoetan, erraz eta eraginkortasunez adierazi ahal izango ditu ideiak eta iritziak, luze eta zehatz; bere ikuspuntua emateko gai izango da, ideia osagarriak eta adibide egokiak emanez; ondo egituratutako testuak idazteko, argi eta zehatz, ideia nagusiak eta bigarren mailakoak bereiziz eta hizkuntza baliabide egokiak aukeratuz, aurreikusitako helburua lortzeko.

C1 erabiltzaile aurreratuaren maila lortzeko, guztira 400 eskola-ordu behar direla aurreikusten da, beti ere B2 mailatik hasita, eta 350 ordu inguru beharko ditu ikasleak ikaskuntza pertsonal eta hizkuntzaren erabilera autonomoa lantzeko.