Gaur egun, gero eta lotura estuagoa dago, batetik, Big Data eta Adimen Artifizialaren teknologiaren eta, bestetik, nanoteknologia medikoaren eta neurozientzien artean. Horren ondorioz, asko areagotu da garuneko informazioa ordenagailuetara bidaltzen duten gailu neuronal adimendunen ekoizpena eta banaketa. Etorkizun ez oso urrun batean, gailu horiek gure garunen konexio neuronalak berridatzi ahal izango dituzte. Garunaren eta konputagailuaren arteko interfazeak, jatorrian, osasun arazo jakin batzuei aurre egiteko eta gizarte inklusiboagoa eraikitzeko diseinatu ziren, baina badirudi joera berriek beste helburu batzuk dituztela, besteak beste, hobekuntza kognitiboa eta burmuinaren estimulazioa lortzea portaera aldatzeko. Teknologia hori neurokapitalismoaren, autokraziaren eta oinarrizko eskubideen arteko bidegurutzean dago.
Pertsona arrunten eta mentalki “hobetutako” pertsonen arteko bizikidetza errealitate bihurtzen hasi da. Beraz, logikoa da pentsatzea Estatuek teknologia horiek herritarrak hobeto kontrolatzeko erabiltzeko tentazioan erortzeko arriskua dagoela. Gauzak horrela, pentsa liteke Europar Batasuna nazioz gaindiko erregulaziorako gune naturala dela; haatik, gai hori alde batera utzi da, neurri handi batean, EBk adimen artifizialari buruz izan berri dituen eztabaidetan. Jean Monnet nEUraLAW moduluak joera horien erronka eta arrisku etiko eta legalak identifikatu eta aztertzen ditu, Europar Batasunean hedatu aurretik. nEUraLAW proiektuak EBko zuzenbidean, oinarrizko eskubideetan, zuzenbide biomedikoan eta datuen babesean adituak diren espezialistak biltzen ditu, neurozientzialari eta ingeniariekin harremanetan jarriz. Helburu nagusia da zientzian eta jakintza-arlo guztietako ebidentzietan oinarritutako elkarrizketa bideratzea, parte hartzaileek arriskuak sailka ditzaten eta arauen aldaketa susta dezaten, herritarren interesak aintzat hartuko direla bermatzeko.
