Misioa eta izaera

Bere kristau tradizioa dela-eta, Deustuko Unibertsitateak uste du Jainkoarenganako fedeak, bizitzari zentzua emateaz gain, kultur prozesu ororen ezagutza gero eta sakonagoa eta kritikoagoa inspiratzen eta pizten duela. Era berean, aitortzen du kulturak, zientziak eta teknologiak kristau mezua ulertzeko eta eguneratzeko tresna baliotsuak eskaintzen dituztela. Horrela, gure unibertsitatea fedearen eta jakintzaren, itxaropen transzendentearen eta etorkizun gizatiarrago baten bilaketaren arteko topagune eta elkarrizketarako leku bihurtzen da. Horretan datza Elizaren Unibertsitatea izatearen erronka.

Hasiera-hasieratik, Jesusen Lagundiaren misioarekin lotuta, Deustuko Unibertsitatea mundu mailako unibertsitate-sare baten parte da, pertsona balio nagusitzat hartzen duen tradizio pedagogiko batean. Halaber, justizia, bizitzarekiko errespetua, giza eskubideak, ondasunak banatzeko justizia, bakea eta natura denon etxe gisa babesteko konpromisoa partekatzen du.

Bokazio unibertsalarekin eta gizakiarekiko interes orokorrari loturik, Deustuko Unibertsitatea euskal gizartetik bereziki hurbil sentitzen da, unibertsitate erakunde gisa zerbitzatu nahi baitu haren premia kultural, sozial, tekniko eta ekonomikoetan.

Deustuko Unibertsitateak emakume eta gizonen komunitatetzat hartzen du unibertsitateko bizitza, errespetuzko elkarrizketak lankidetza-eta adiskidetasun-harremanak erraztuko dituen bizikidetza-eredua eskaintzen ahalegintzen den komunitatetzat.

Jesuiten Unibertsitatearen Misioak eskatzen du, gainera, bere helburuak (fedea, justizia eta kultura) giro batean eta eragile erlijioso, kultural edo sozialekin hitz egiteko dinamikan garatzea, haien lankidetzaren mende baitaude oinarrizko balioak, hala nola bakea, justizia, harmonia, giza eskubideak eta errespetua, fededunen eta fedegabeen artean partekatuak eta partekagarriak direnak. 

Pertsona eta erakunde gisa dugun nahia mundu bidezkoago, solidarioago eta gizatiarragoa eraikitzen laguntzea da. Horretarako, honako hauek ditugu:

• Etorkizuneko helmuga markatzen duen ikuspegia, eta urteetan zehar gure plan estrategikoetan islatzen duguna. 
• Mundu hobea lortzera bideratzen gaituen misioa da, Deustuko Unibertsitateko egitasmoan jasota dagoena.
• Deustuko Marko Pedagogikoa, berrikuntza pedagogikorantz gidatzen gaituena eta Deustuko Unibertsitateak gure egungo inguruneari ematen dion erantzuna bereizten duena.
• Zentzumenak erne eta begiak zabalik etengabe aldatzen ari den mundura begira, ideia eta ekintza berriak eskatzen dituen mundu batera, hala nola Deusto Giza Eskubideak Ingurune Digitaletan adierazpena, oinarrizko eskubideak baitira, aro digitalean mugak jartzea eta pertsonen pribatutasuna eta duintasuna babestea lortu nahi dutenak.

Jesusen Lagundia, erakunde fundatzailea den aldetik, Deustuko Unibertsitatearen titularra da, eta hari dagokio beraren gaineko tutoretza orokorra eta bere Misioa betetzearen eta Lagundiaren Misio Orokorrean sartzearen azken erantzukizuna, Elizaren eta gizartearen zerbitzura.

Jesusen Lagundiak bere agintarien bidez gauzatzen ditu tutoretza-eginkizun horiek, bere konstituzio eta arauen arabera, eta Unibertsitatearen berehalako gobernua eta zuzendaritza Estatutu hauetan ezarritako organoen esku uzten ditu, bere eskumenen arabera.

Unibertsitatearen Misioaren printzipio eta balioekin bat etorriz, hura garatzen eta finkatzen lagundu nahi duten pertsonak eta erakundeak bildu daitezke titulartasunera. Titular bildu bakoitzaren eskubideak eta betebeharrak hitzarmen partikularren bidez zehaztu eta arautuko dira, hala badagokio.