Kristau tradizioan sustraiak izanik, uste sendoa du Jainkoarenganako fedeak, bizitzari zentzua emateaz gain, benetan gizatiarra den kultura-prozesu ororen ezagutza gero eta sakonagoa eta kritikoagoa sorrarazten eta suspertzen duela. Onartzen du, bestalde, kulturak, zientziak eta teknologiak, tresna baliotsuak eskaintzen dituztela kristau mezuaren ulermena eguneratzeko. Horrek guztiak fedearen eta jakintzaren elkarrizketarako leku bihurtzen du, itxaropen transzendentearen eta guztiontzako etorkizun gizatiarragoaren bilaketarako topagune. Horretan datza nagusiki Elizaren Unibertsitate izatea.
Aldi berean, Deustuko Unibertsitatea jabetzen da, bere sorreratik, Jesusen Lagundiaren misioari lotuta dagoela. Horrela, mundu mailako sare unibertsitario batean txertatuta dago eta pertsona balio nagusi gisa hartzen duen tradizio pedagogiko batean. Halaber, gaur egun, uste sendoa du fedearen aldeko zerbitzuak justizia sustatzea dakarrela. Horregatik, kulturari buruzko hausnarketa eginez eta gizarteko eragileekin solasean, konpromisoa hartzen du bere ahotsa entzunarazteko, gizakiak eta gizarteak beren etorkizuna arriskuan jartzen duten leku guztietan; zehazki, bizitzarekiko errespetuan, giza eskubideen ezarpen unibertsalean, ondasunen bidezko banaketan, bakea lantzen eta natura babesten.
Unibertsitateak berezkoa duen jakintzaren eta giza gaiekiko interes orokorraren ikuspegi unibertsalaren barruan, Deusto euskal gizartetik bereziki hurbil sentitzen da; izan ere, euskal gizarteari zerbitzu eman nahi dio unibertsitate-erakunde gisa, bai kultura arloko beharretan, bai maila guztietako garapen sozial, tekniko eta ekonomikoan.
Pertsonaren lehentasuna dela eta, azkenik, unibertsitate honek unibertsitateko bizitza gizon-emakumeen elkarte gisa ulertzen du, errespetuzko elkarrizketak izateko ahalegina egiten duen elkarte gisa, lankidetza eta adiskidetasun harremanak erraztuko dituen bizikidetza-eredua eskaintzen ahalegintzen den elkarte gisa.
Misioa eta identitatea
Deustuko Unibertsitateak gizarteari zerbitzua eskaini nahi dio, unibertsitateko ekarpena eginez, errealitatearen ikuspegi kristautik abiatuta.
Unibertsitatea den aldetik, jakinduriarekiko maitasunak eta errealitatea zorroztasunez eta metodologia zientifikoz ezagutzeko eta ikertzeko grina ditu gidari. Hori dela eta, irakaskuntzaren eta ikerkuntzaren bikaintasuna bilatzen du. Aldi berean, pertsona askeak, herritar arduratsuak eta profesional trebeak prestatu nahi ditu, jakintza, balio eta trebetasunez hornituak, jakintzaren sustapenean eta gizartearen eraldaketan konpromisoa hartzeko prest izango direnak.
Unibertsitate-proiektua
Fedea, justizia eta kultura
Mundu gizatiarragoa
Horrez gain, Jesuiten Unibertsitate baten Misioak eskatzen du haren helburuak (fedea, justizia eta kultura) elkarrizketako giro eta dinamika batean garatzea erlijio, kultura edo gizarte eragileekin. Izan ere, eragile horien lankidetzaren mende daude oinarrizko balioak, hala nola, bakea, justizia, harmonia, giza eskubideak eta errespetua. Horiek guztiak partekatzen ditugu eta partekagarri dira sinestunen eta sinesten ez dutenen artean.
Deustuko Unibertsitatea, beste zortzi erakunderekin batera, Unibertsitate, Fakultate eta Goi Mailako Irakaskuntzako Erakundeen Federazioko (UNIJES) kidea da, estatutu-xedapenen bidez Jesusen Lagundiari lotuak edo eraikiak espainiar Estatuan.
Azken urteotan, Deustok Plan Estrategikoak definitu ditu. Plan horiek, aukera estrategikoetatik abiatuta, etorkizuneko Ikuspegiari begiratzen dioten jarduerak ezartzen dituzte. Pertsona eta erakunde garen aldetik, gure nahia da ekarpen positiboa egitea mundu bidezkoago, solidarioago eta gizatiarragoa eraikitzeko, Deustuko Unibertsitateko Egitasmoan jasoa dugun misioaren orientazioari jarraituz. Unibertsitateak Deustoko Esparru Pedagogikoa ezarri du berrikuntza pedagogikoaren jomuga gisa, unibertsitateak gure egungo inguruneari ematen dion erantzun bereizgarri gisa.
Identitatea eta Misioa Deustuko Unibertsitatean
