DeustoBarometro Soziala (DBSoc) Deustuko Unibertsitateak 2013ko abenduan abian jarritako inkesta da, Euskal Autonomia Erkidegoko egoera sozial, ekonomiko eta politikoari buruzko ezagutza erabilgarri eta aplikatua sortzeko (gizarte-zientzietatik).
Gizarte konpromisoa barometro berri honen identitatearen parte da. Barometro berri horren helburua da batez ere desberdintasunekin eta gizarte ongizatearekin zerikusia duten gaiak ikusaraztea, genero ikuspegia maila gorenean txertatuz.
Inkesta online egiten da 1.000 pertsonako lagin adierazgarrian (sexuaren, adinaren eta klase sozialaren arabera), sei hilean behin egiten da eta galdera-bloke finko bat eta bloke aldakorra edo koiunturala izaten ditu. Eduki finkoan honako gai hauei buruzko galderak sartzen dira: gizarte-politikak eta ongizate-estatuarekiko jarrerak, genero-desberdintasunaren adierazleak, ekonomia eta enplegua, bizi-baldintzak, gazteak, demokraziaren kalitatea, immigrazioa, balioak, jarrera politikoak eta identitatea. Bloke aldakorrak sakon jorratzen du gaurkotasuneko gairen bat edo euskal gizartearen kezka bizienekin lotutako gaia.
