Miren Berasategik irekiko du “Emakume zientzialarien argitan” zikloa, eta adimen artifizialak egungo gizartean duen eragina aztertuko du

Elhuyarrek eta Donostia Kulturak antolatutako ekimenak emakumeek zientziaren eta teknologiaren esparruan egindako ekarpenak ikusaraztea du helburu

Emakume zientzialarien argitan

2026ko urriak 06

Donostia-San Sebastián

Deustuko Unibertsitateko ikertzaile eta irakasle Miren Berasategi Zeberiok inauguratuko du Elhuyarrek eta Donostia Kulturak elkarlanean antolatutako “Emakume zientzialarien argitan” solasaldi-zikloa, urriaren 6an, 19:00etan, Ernest Lluch kultur etxeko ekitaldi-aretoan (Donostia). “Adimen artifiziala auzitan” izenburupean, Berasategiren hitzaldiak azaleratzen ari diren teknologien erronkak, alborapenak eta inpaktuak eta datuen prozesamendua jorratuko ditu egungo gizartean.

Miren Berasategi Zeberio (Donostia, 1982) Giza Zientzietan eta Komunikazioan lizentziaduna eta Komunikazioan doktorea da. Deustuko Unibertsitatean ari da irakasten eta ikertzen, eta komunikazio digitalaren, datuen analisiaren eta komunikazioaren teoriaren arloetan espezializatu da. Era berean, InpAkta aldizkari zientifikoko (Inpaktu Sozialeko Ikerlanen Akta) erredakzio-taldeko kidea da, eta Udako Euskal Unibertsitateko (UEU) errektoretzako kidea.

Emakumeen talentu zientifikoa ikusarazteko ziklo bat

“Emakume zientzialarien argitan” proiektua, Elhuyarrek eta Donostia Kulturak elkarrekin antolatua, emakume ikertzaileen zeregina aldarrikatzeko helburuarekin sortu da, historikoki emakumeek zientzian eta teknologian egindako ekarpenak baztertuta edo ezkutatuta geratu baitira.

Miren Berasategik emandako saioaz gain, 2026ko udazkeneko zikloak beste bi hitzaldi eskainiko ditu:

-Azaroaren 3an: Garbiñe Elizegi Narbartek (Erizaintzako doktorea), “Emakume eta genero ez-normatibo euskaldunak osasungintzan” hitzaldia eskainiko du. 

-Abenduaren 1ean: Estitxu Villamor Lomasek (Fisikako doktorea), “Trantsizio energetikoaz hausnartzen” gaia jorratuko du. 

Solasaldi guztiak euskara hutsean egingo dira. Aurrez aurre joaterik ez dutenentzat, solasaldietako audioak DK Irratiko podcastetan eta Elhuyarren kanalean egongo dira eskuragarri.