2023ko irailak 26
Donostiako Campusa
Gizarte eta Giza Zientzien Fakultateko irakasle Mª Pilar Rodriguezek Donostiako Zinemaldiko (irailak 22-30) mahai-inguru batean parte hartu zuen irailaren 26an: "Diskriminazioa eta genero-estereotipoak desagerraraztea ikus-entzunezkoetan: pantailan norbera errekonozitzearen plazera", Zinemaldiko Pentsamendua eta Eztabaida arloak antolatua. Helburua da topaketarako, sorkuntzarako eta ezagutza transmititzeko gune gisa duen izaera nabarmentzea. Zinemaldiko sailekin elkarrizketan, zeharkako arlo honek gai, formatu eta pertsona garrantzitsuak identifikatzen ditu, eztabaida gidatzeko eta erantzun berritzaileak garatzeko, kultura zinematografiko garaikideak eta jaialdien nazioarteko zirkuituak dituzten erronka eta kezka nagusien inguruan. Horretarako, lau ildo estrategiko nagusi definitu dira, Zinemaldia honako arlo hauekin erlazionatzeko moduei buruz galdetzeko: sorkuntza (prestakuntza programak, proiektuen garapena eta talentu berriei laguntzea), industria (ekoizpen eta banaketa egiturak, teknologia berriak, sektoreko laneko jasangarritasun ereduak), lurraldea (hiri-ingurunearekiko eta arkitekturarekiko harremana, aurrez aurreko zinema erakustaldien ereduak, jaialdien inpaktu ekonomikoa) eta komunitatea (genero identitateak eta ingurumen jasangarritasuna).
Pentsamendua eta Eztabaida arloak, zeharkakoa denez, jarraian aipatzen diren beste jarduera batzuk ditu, hainbat egoitzatan izango direnak eta, solasaldiekin batera, edizio honetako arloko programa publikoa osatzen dutenak.
Aurten, Pentsamendua eta Eztabaida osatzen duen taldeak lan egin du nola RTVEko Berdintasun Behatokiarekin hala 2025eko 50/50 Ikus-entzunezkoen alorreko Berdintasuneko Lurralde arteko Lantaldearekin: AAMMA Andaluziako Ikus-entzunezkoen Emakumeen Elkartea, AMMA (Murtzia), Dona i Cinema (Comunitat Valenciana), Dones Visuals (Katalunia), Hemen (Euskadi), MIA (Emakumeak Animazioaren Industrian) eta CIMA Emakume Zinemagileen eta Ikus-entzunezko Hedabideetako Emakumeen Elkartea. Erakunde eta elkarte horiekin, bi mahai-inguru antolatu dira, emakumeek zineman aurre egin behar dieten funtsezko bi gairen inguruan arreta jartzeko: abusuak eta filmaketetako erasoak, baita hainbat paper eskuratzeko diskriminazioa ere. Lehenengoan, Mª Pilar Rodríguez irakasleak parte hartu zuen.
1- Diskriminazioa eta genero-estereotipoak desagerraraztea ikus-entzunezkoetan: pantailan norbera errekonozitzearen plazera
Asteartea, irailak 26, 18:00etan, Kursaaleko prentsaurrekoen aretoan. Parte hartzaileak: Clara Sans, Paz de Alarcón, Arantxa Echevarría eta Pilar Rodríguez Pérez. Moderatzailea: Beatriz Aparicio, RTVEko Berdintasun Behatokiko albokoa. Sarrera akreditazioarekin.
2- Abusurik gabeko ikus-entzunezkoetarako jardunbide egokiak
Asteazkena, irailak 27, 11:00etan, San Telmo Museoko Ekitaldi Aretoan. Parte hartzaileak: Carla Vall i Duran (abokatua), Aina Gimeno (aktorea) eta Maitane San Nicolas (intimitate-aholkularia). Moderatzailea: Virginia Yagüe, Damako presidentea. Sarrera akreditazioarekin.
María Pilar Rodríguez Filologia Hispanikoan lizentziatua da Deustuko Unibertsitatean, eta ingeleseko tituluduna Hizkuntza Eskola Ofizialean. Hizkuntza eta literatura erromantzeetan doktorea da Harvardeko Unibertsitatean (Cambridge, AEB). 2002ra arte irakasle izan zen Columbiako Unibertsitatean (New York, AEB), eta gaur egun irakaslea da Deustuko Unibertsitatean, Donostian. Literaturari, zinemari, kulturari eta genero-ikerketei buruzko artikulu ugari argitaratu ditu, baita Vidas im/propias: transformaciones del sujeto femenino en la narrativa española contemporánea (Indiana, Purdue UP, 2000) eta Mundos en conflicto: aproximaciones al cine vasco de los noventa (Donostia, Deustuko Unibertsitatea-Euskadiko Filmategia, 2002) izeneko bi liburu ere. 2003ko Carmen de Burgos Saiakera Saria irabazi zuen, Una revisión de la modernidad desde la perspectiva de género: tres relatos de Carmen de Burgos lanarekin, eta 2005eko Becerro de Bengoa Saiakera Saria, Extranjeras: migraciones, globalización, multiculturalismo lanarekin. Gaur egun, Komunikazioko ikertaldeko ikertzaile nagusia da.
