2023ko urtarrilak 23
Bilboko Campusa
Graduondoko 46 ikaslek, UPV/EHUkoak (44), Deustuko Unibertsitatekoak (1) eta Mondragon Unibertsitatekoak (1), plaza lortu dute Bilboko Udal Etxebizitzak Gazte Solidarioen Programaren hamahirugarren ediziora bideratutako 20 pisuetan. Deustuko ikaslea Ekuadorko Denisse Beatriz López Lozano da, eta Hezkuntza Premia Berezietako Unibertsitate Masterra egiten ari da.
Programak udal etxebizitzak eskaintzen ditu alokairu partekatuan, pertsona bakoitzeko 55 euroko prezio sinbolikoan hilean (argia eta ur gastuak sartu gabe) eta sukalde eta altzariz hornituta. Horren truke, ikasleek elkarlanean aritzen dira proiektu komunitarioetan eta kolektibo ahulenen alde Otxarkoaga eta Bilbo Zaharreko auzoetan, toki horietan baitaude alokatzen dituzten pisu horiek. Oraingo honetan 15 elkartek parte hartzen dute programan, besteak beste, Bilbo Zaharrean: Aldauri, Bakuva, Bilbao Historiko, Claret Fundazioa, Crea Africa, Gugaz Aurrera (baita Otxarkoagan ere), Itaka, Sartu, Tximeleta; eta Otxarkoagan: Amuge, Bizitegi, Cáritas, Artatse HLHI, Txurdinaga BHI, Tendel.
Jon Bilbao Etxebizitzako zinegotzi eta Udal Etxebizitzetako presidentearen hitzetan, “programa honen beste edizio bat gehiago eustearen aldeko apustua egin dugu, eta dagoeneko hamahiru dira, eta helburu bikoitza du: ikasleentzako etxebizitza eskuragarrien aukerak ematea eta auzoko arrazoi sozialetan udal-etxebizitzetan bizi diren gazteak inplikatzen laguntzea.
Edizio berriaren aurkezpen ekitaldian, Jon Bilbaoz gain, Gorka Moreno UPV/EHUko Bizkaiko Campuseko errektoreordea, Nekane Garatea Deustuko Unibertsitateko Nazioarteko Harremanetarako bulegoko ostatu eta harrera arloko arduraduna eta Aitzol Garmendia Mondragon Unibertsitateko eta unibertsitate horrek Bilbon duen LEINN graduko ordezkaria izan ziren.
Edizio berriaren nondik norakoak azaldu ondoren, Otxarkoaga auzoan programarako egokitutako pisuetako bat ikusi zen, ikaslearekin batera, bertan bizi baita eta AMUGE Elkartean (Euskadiko Emakume Ijitoak Sustatzeko eta Ahalduntzeko Kultura Arteko Elkartea) gizarte-lankidetzako lana egiten baitu.
Hasieratik 450 gaztek baino gehiagok parte hartu dute Udal Etxebizitzek sustatzen duten Gazte Solidarioen programan, 26 urteko batez besteko adinarekin. Edizio honetan, unibertsitateko 2022/23 ikasturterako etxebizitza partekatua lortu duten 46 gazteetatik % 54,8 emakumeak dira eta % 45,2 gizonak.
