2025eko azaroak 27
Bilboko Campusa
Ernesto Panaderok, Deustuko Unibertsitateko Ikerbasque Research Professor-ek eta Dublin City Universityko (DCU) Centre for Assessment Research, Policy and Practice in Education (CARPE) zentroko zuzendariak, Irlandako hezkuntza-sistemarentzat garrantzi handia duen ekitaldi nazional bat antolatu eta zuzendu zuen joan den azaroaren 22an, Dublinen: “100 Years of the Leaving Certificate: Past Insights, Future Directions ”.
Leaving Certificate bigarren hezkuntzaren etapa amaierako azterketa da Irlandan, eta, duela mende batetik, unibertsitatera sartzeko eta herrialdeko hezkuntza-sistema egituratzeko elementu nagusia da. Europako beste herrialde batzuetan dauden unibertsitatera sartzeko probek baino garrantzi handiagoa du gizartean eta hezkuntzan. Probaren sorreraren urteurrenak eztabaida nazional zabala sortu du etorkizuneko paperari buruz, eta horrek garrantzi berezia ematen dio topaketa akademiko honi.
Ekitaldiak, DCUren Institute of Education-en ospatuak, hogei hizlari baino gehiago eta ordezkaritza instituzional zabala bildu zituen. Inaugurazio-saioa Maura Coulter Associate Dean for Research-ek eta Panadero irakasleak berak ireki zuten. Azken horrek ekitaldiaren anfitrioi gisa ere jardun zuen eta jardunaldia koordinatu zuen.
Programak bi hitzaldi nagusi izan zituen, nazioarteko lehen mailako adituen eskutik: Andrea Feeney, State Examinations Commission-eko CEOa, Irlandako estatu-mailako azterketen agintaritzaren arduraduna, eta Jo-Anne Baird, Oxford University Centre for Educational Assessment-eko zuzendaria eta hezkuntza-ebaluazioan eragin handiena duen ikertzaileetako bat.
Gainera, saio paralelo ugari egin ziren lider akademikoekin, arduradun politikoekin, eskola-zuzendariekin, irakasleekin eta ikasleen ordezkariekin, eta funtsezko gaiak jorratu ziren, hala nola ekitatea, curriculumaren erreformak, errendimenduaren ebaluazioa, ebaluazio-osagai alternatiboak eta ikasleen osasun mentala eskakizun handiko testuinguruetan.
Deustuko Unibertsitateko ikertzaileak amaiera eman zion ekitaldiari, azken eztabaidako panel baten moderatzaile lanetan, hezkuntza-arloko pertsona nabarmenekin, besteak beste, Baird eta Feeney irakasleekin eta Irlandako irakasleen eta ikasleen ordezkariekin.
