2022ko azaroak 22
Bilboko Campusa
Azaroaren 8tik 10era bitartean, Pedro Arrupe Giza Eskubideen Institutuak Medellinen (Kolonbia) egin zen Nazioarteko II. Mintegian, Fortalecimiento de la conducta empresarial responsable de los derechos humanos en el ámbito subnacional izenekoan, parte hartu zuen.
Latinoamerikako eta Europako Lurralde Arduratsuak Aliantzak (ATRAE gaztelaniazko sigletan) antolatu zuen mintegia, eta Pedro Arrupe Giza Eskubideen Institutuak 2021eko abenduan Buenos Airesen (Argentina) eratu zenetik parte hartzen du bertan. Aliantza Kolonbiako (Antioquia, Valle de Cauca eta Cundinamarca departamenduak) eta Argentinako (Buenos Aires Hiria eta Salta eta San Juan probintziak) estatuz azpiko gobernuen erakunde eta ordezkari sare zabal batek osatzen du. Gainera, erakunde laguntzaileak dira Giza Eskubideen aldeko Nazio Batuen Erakundearen Goi Komisarioa (ACNUDH), Red Pacto Global (Argentina) eta Kolonbiako Oficina Técnica de Cooperación, Espainiako Garapenerako Lankidetzako Espainiar Agentziakoa (AECID gaztelaniazko sigletan).
Medellingo mintegian, ATRAE aliantzako erakundeek eta Peruko (Ica departamentua), Argentinako (Chubut, Córdoba, Formosa, Jujuy, Mendoza eta San Luis probintzietako) eta Kolonbiako (Bolivar eta Santanderko departamentuak eta Departamentuen Federazio Nazionala) estatuz azpiko beste gobernu batzuetako ordezkariek parte hartu zuten. Era berean, Eusko Jaurlaritzak Kolonbian, Txilen eta Venezuelan duen Ordezkaritzako enpresa-arduradunak ere parte hartu zuen topaketan.
ATRAE aliantzaren helburua enpresa-jokabide arduratsuak sustatzea da, giza eskubideei, enpresei eta garapen iraunkorrari buruzko politika publikoak garatuz Latinoamerikako eta Europako estatuz azpiko erakundeetan, enpresa-sektorearen, gizarte zibilaren, komunitateen eta eskubideen eta interes-taldeen titular diren beste kolektibo batzuen parte-hartzearekin. Asmo horretan oinarrituta, Medellingo Sarearen Nazioarteko II. Mintegiak enpresei eta giza eskubideei buruzko ezagutza sortzeko eta ekintza-planak ezartzeko esperientziak partekatzeko aukera eman zien erakundeei.
Aliantzak Europar Batasunaren ADELANTE Programaren babesa du. Programa hori Latinoamerikako eta Karibeko herrialdeen arteko eta herrialde horiek Europarekin dituzten harreman horizontalak sustatzera eta lankidetza triangeluarra bultzatzera bideratuta dago, ezagutzaren trukea sustatzeko eta bazkide guztiek garapen iraunkorrera bideratutako irtenbideak emateko duten gaitasuna aprobetxatzeko.
