2025eko uztailak 09
Bilbao
Uztailaren 8tik 10era, Deustuko Unibertsitateak EDUCSIren (Jesusen Konpainiaren Hezkuntza) Hezkuntzako Jardunaldiak hartuko ditu. Bi urtez behingo topaketa da, eta XXXVI. edizioan, Espainiako Probintziako eta Portugalgo jesuiten fundazio eta ikastetxeetako ia 280 arduradun bilduko ditu. “Elkarrizketaren bidez bir-sortzen den nortasuna” leloa harturik, edizio honek sareko azken topaketen ildoari jarraituko dio: ikastetxe katoliko baten nortasunari buruzko hausnarketa, jesuiten eskola batena.
“Gaur beti da oraindik. Bizitza osoa orain da, eta orain da unerik onena”. Antonio Machadoren aipu honekin, María Luisa Berzosa FIk itxi zuen bere hitzaldia lehenengo saioan. Esaldi horrek argi eta garbi adierazten du hezkuntza-prozesuaren bihotza: sakontasunez begiratzea, entzun eta ulertzea eta ausardiaz konprometitzea.
Inaugurazio jardunaldian, Enric Puiggròsek (SJ), Jesusen Lagundiko probintzialak, parte hartu zuen eta hezkuntzaren misioa erronka bizien testuinguruan kokatu zuen: polarizazio politikoa, adimen artifiziala eta transzendentzia zentzua ahultzea. Errealitate horren aurrean, ikastetxeen asmo katolikoaren aldeko apustu garbia defendatu zuen.
Ekitaldian izan ziren, halaber, Jaime Badiola (SJ) Jesuiten Hezkuntzako ordezkaria, eta Juan José Etxeberria (SJ), Deustuko Unibertsitateko errektorea. Lehenak elkarrizketa eta nortasuna elkarren aurkakoak ez direla azpimarratu zuen, baizik eta elkarren beharra dutela; eta bigarrenak hau adierazi zuen: “heztea begiratzen, ulertzen eta konpromisoa hartzen laguntzea da”. Hori guztia honela gorpuztuko litzateke: herritartasuna eraikitzea, demokrazia benetan parte hartuta bizitzea eta gazteei konfiantza emanez laguntzea, biderik ezarri gabe eta haien ondoan egonda. Eguneroko zaintzaren pedagogia da, non txikia eta iraunkorra eraldaketa sakon bihurtzen den. Hitzaldi osoa.
Otoitzerako espazioen, ponentzien, lantaldeen eta bisita kulturalen bidez, jardunaldiek EDUCSIren hezkuntza-misioa berritu nahi dute, dizernimendua, erantzunkidetasuna eta elkarrizketarako zabaltasuna eskatzen den garaian. Hizlarien artean daude Daniel Patrick Huang jesuita, testuinguru pluraletako ebanjelizazioaren erronkei buruzko erakusketa batekin; eta Francisco José Ruiz (SJ) eta Pilar López, ignaziotar lidergoaren eta gobernantza arduratsuaren gakoak jorratuko dituztenak.
