2026ko ekainak 26
Eusko Legebiltzarra
Gizarte Zientzien Fakultateko ikertzaile Braulio Gómez Fortesek aditu gisa hartu zuen parte ekainaren 24an Eusko Legebiltzarrean egin zen Euskadiko kalitate demokratikoa hobetzeko ponentzian. Lege aldaketa bat edo batzuk garatzeko oinarriak ezartzen lagunduko du Gómezen ekarpenak, Euskadik arau-esparru zabala, berritua eta abangoardiakoa izan dezan, demokrazian erreferentziazko herrialde bihurtzeko bidean.
Ponentziak sustatzen duen ideal demokratikoak giza eskubideetan, duintasunean eta pertsona guztien errespetuan oinarritu behar du; guztion ongia lehenetsi behar du; politika publikoen balio demokratikoa indartu behar du; herritarrei eta gizarte eragileei entzun eta haiekin lankidetza sustatu behar du; eztabaida publikoaren kalitatea indartu behar du; desinformazioari aurre egin behar dio; balio etiko eta demokratikoetan sakondu behar du, eta askatasunean, aniztasunean, berdintasunean eta justizia sozialean oinarritutako balioak sustatu behar ditu.
Deustuko Unibertsitateko ikertzaileak bere diagnostikoa eta demokraziaren kalitatea inklusibitatearen ikuspegitik hobetzeko proposamenak aurkeztu zituen. Ildo horretan, bi lan-ildo aurkeztu zituen: alde batetik, desberdintasun politikoa murrizteko eta hirietako herritar behartsuenen artean hauteskundeetako inklusioa areagotzeko, eta, bestetik, euskal lurraldean bizi diren migratzaileek bozkatzeko oinarrizko eskubidea gainerako herritarren baldintza berberetan eskuratu ahal izateko beharrezkoak diren lege-aldaketak erraztu eta bultzatzeko.
