2023ko azaroak 20
Bilboko Campusa
Deustuko Unibertsitateak eta Alboan GKE Fundazioak lankidetza hitzarmena berritu dute gaur, azaroak 20, eta "Elkarrekin mundua eraldatzen" topaketarekin ospatu dute. Topaketa horretan, ekintza eta proiektuetan parte hartuz, misio partekatua hedatzea ahalbidetzen duten pertsonak bildu dira. Juan Jose Etxeberria Deustuko Unibertsitateko errektoreak eta Martin Iriberri Alboan eta Entreculturas-eko zuzendari nagusiak "mundu bidezkoagoa" sortzeko bi erakundeen konpromiso irmoa irudikatu dute horrela.
Deusto eta Alboan erakundeek irmoki sinesten dute pertsonek ingurunea eraldatzeko duten gaitasunean eta erakunde, entitate eta taldeekiko lankidetzaren eragin biderkatzailean. Horrekin bat etorriz, Deustuko Unibertsitateak egunero lan egiten du "pertsonak ardatz dituen unibertsitatea izateko". Bestalde, Alboan-en helburua da bazterkeriaren mugetan bizi diren pertsona baztertu eta kalteberengandik "modu afektiboan eta efektiboan” gertu egotea, sistema bidegabearen ondorioak pairatzen dituzten herrialdeetan. Ildo horretan, migratzaile eta errefuxiatuekin lan egiten du, baita arrisku eta kalteberatasun egoeran dauden emakume eta neskatoekin ere. "Lan egiten duten erakunde aliatuekin elkarri laguntzea ezaugarri duen jarduteko moduari" esker egiten du lan hori.
Ekitaldian, genero indarkeriaren biktima izan den Erdialdeko Amerikako emakume baten testigantzaren bideoa proiektatu da, eta, ondoren, Karina Fonsecak, Costa Ricako Migratzaileentzako Jesuiten Zerbitzuko zuzendari nazionalak, bere esperientziaren bidez, Erdialdeko Amerikako errealitateaz hitz egin du, migrazio fenomenoen konplexutasunari erantzuteko diziplina anitzeko sektore arteko lanaren garrantziaz.
Nazioarteko Praktika Solidarioak
Deusto eta Alboanentzat ere lehentasunezkoa da eraldaketa pertsonal, komunitario eta sozialeko prozesuak bultzatzea, eta, horretarako, tokiko dimentsioa eta dimentsio globala lotzen dituzten proiektuak abian jartzen dituzte. Ekimen horietako bat, boluntariotzaren arloan, nazioarteko praktika solidarioen programa da. Programa horrek aukera ematen die graduko ikasleei beren praktikak pobrezia eta bazterkeria ingurunean egiteko, ikuspegi solidario nabarmenarekin. Praktika gehienak proiektu ekonomiko produktibo eta sozial babesten dituzten jesuiten erakunde eta zentro sozialetan egiten dira, batez ere Latinoamerikan. Aner San Nicolás, Nazioarteko Harremanak eta Zuzenbideko gradu bikoitzeko ikaslea, eta Luis Astorqui, EAZ eta Zuzenbideko gradu bikoitzeko ikaslea, izan dira ekintza hori kontatzeaz arduratu direnak, beren esperientziaren kontakizunaren bidez.
Jardunaldia amaitzeko, Mary Tere Guzmán Alboan Unibertsitateko zuzendari exekutiboak eta Deustuko Unibertsitateko errektoreak hitz egin dute. Jarraian, Juan José Etxeberriak eta Martín Iriberrik, Alboan eta Entreculturaseko zuzendari nagusiak, hitzarmena berritzeko sinadurarekin itxi dute ekitaldia. Akordio berri horrek jarraipena ematen dio 2004az geroztik bi erakundeek sentsibilizazioaren, irakaskuntzaren, ikerketaren edo boluntariotzaren arloan elkarrekin egiten duten lanari. Gaur egungo erronkei batera erantzun nahi zaien jarduera ugari, betiere "pertsona guztien eta, bereziki, ahulenen bizitza hobetzeko helburu nagusiarekin".
