2024ko irailak 05
Bilboko Campusa
Deustuko Unibertsitateak eta SSI Taldeak (Servicios Sociales Integrados S. Coop.) hitzarmen bat sinatu dute Gizarte Lanaren arloko prestakuntza eta ikerketa hobetzeko gune zientifiko-profesional bat sortzeko. Deusto Gizarte Balioak ikertaldeak eta Gizarte Laneko graduak bultzatutako akordio horren ildo estrategikoak hiru izango dira: adineko pertsonekin eta haien ingurunearekin esku hartzea, gizartean kalteberatasun egoeran dauden emakume eta adingabeekin esku hartzea, eta zaintza eta zilarrezko ekonomia profesionalizatzea.
Lankidetzak, halaber, aipatutako kolektibo eta arloekin gizartean esku hartzearen ezagutzan izandako aurrerapenak zabaltzen laguntzea espero da, komunitate akademiko, profesional, politiko eta sozialarekin partekatu eta aurrez aurre jartzeko jardunaldiak edo mintegiak antolatuz, bai eta Gizarte Lanean ikertzeko bokazioa eta ikerketa aplikatuen edo doktorego tesien garapena sustatzea ere.
Juan José Etxeberria Deustuko Unibertsitateko errektoreak eta Karmele Acedo SSI taldeko CEOak sinatu zuten akordioa, Ane Ferran Gizarte eta Giza Zientzien Fakultateko dekanoaren eta Martin Zuñiga Deusto Gizarte Balioak taldeko ikertzaile eta hitzarmenaren arduradunaren aurrean. SSI Taldearen aldetik, Merche Arribas, Taldeko presidentea; Rosa Lavín, Ekonomia eta Finantzako zuzendaria; eta Andere Goirigolzarri, I+Gko arduraduna ere ekitaldian izan ziren.
