2025eko irailak 04
Bilboko Campusa
Deustuko Unibertsitateak eta Cuatrecasasek lankidetza-hitzarmena sinatu dute Zuzenbide Fakultatean Kontratazio Publikoaren Zuzenbideko Katedra abian jartzeko. Zentro horren helburua kontratazio publikoaren arloko ikerketa, hausnarketa kritikoa eta prestakuntza sustatzea da, bai Espainiako testuinguruan, bai Europakoan, eta erreferente akademiko eta profesional bihurtu nahi du. Dokumentua Juan Jose Etxeberria errektoreak eta Javier Fontcuberta Cuatrecasaseko kontseilari ordezkariak sinatu dute.
Ekimen horren garrantzia datuetan islatzen da: Espainian, 2023an, kontratazio publikoa BPGaren % 11,55 eta gastu publikoaren % 24,87 izan zen, Kontratazioa Arautzeko eta Gainbegiratzeko Bulego Independentearen arabera (OIReScon gaztelaniazko sigletan). Eragina ez da azpiegiturak sortzera edo zerbitzuak ematera mugatzen, baizik eta erakundeengan, enpresengan eta herritarrengan eragin zuzena duten gizarte eta ingurumen arloko politiken garapenean ere eragiten du.
Martxan dagoen jarduera-plana
Lehenengo ikasturtean, Katedrak hainbat lan-ildo aktibatuko ditu. Ikerketaren eta prestakuntzaren arloetan, Cuatrecasaseko langileek Zuzenbide Ekonomikoko eta Enpresako doktorego bateratuko programan parte hartu ahal izango dute, Deusto, Comillas eta Ramon Llull unibertsitateekin lankidetzan. Gainera, Katedraren batzorde zientifikoak esparru akademikoko espezialistak, Deustuko Unibertsitateko irakasleak eta UNIJES-Jesuiten Unibertsitateen sareko beste unibertsitate-zentro batzuetakoak bilduko ditu, Cuatrecasaseko profesionalekin eta enpresa-arloko adituekin batera, baita organo administratibo eta judizialetakoekin ere. Era berean, argitalpen digital bat sortzea aurreikusten da ISBNarekin, mintegien, urteko hitzaldien eta artikulu espezializatuen emaitzak jasoko dituena.
Ikasleentzako praktikei dagokienez, Experiencia Cuatrecasas programaren bidez, abokatutzaren praktika hurbildu nahi zaie graduko eta graduondoko ikasleei, hainbat jardueraren bidez. Jarduera horietako batzuk dagoeneko existitzen dira Cuatrecasasek Deustuko Unibertsitateko Zuzenbide Fakultatearekin duen harreman zabalean, hala nola bridge programak, mentoretzak, DeustoLawyersen parte hartzea eta Philip C. Jessup International Law Moot Court Competition lehiaketa ospetsuarekin lotutako masterclasseak. Era berean, praktiketako ikasleek Deustoko Klinika Juridikoan eta Cuatrecasasasen pro bono aholkularitzako ekimenetan lagundu ahal izango dute.
Azkenik, transferentziaren eta eztabaidaren arloan, Katedrak sei hilean behingo biltzar monografikoak eta mintegi espezializatuak antolatuko ditu, ezagutza aplikatua sortzeko asmoz. Jarduera programa hori martxan dago jada, eta Deustok eta Cuatrecasasek eraldaketa sozial eta ekonomikoko eragiletzat jotzen dute, Europako ekonomian pisu handiena duen esparruetako bati modu kritikoan eta diziplina anitzetan heltzen baitio.
