2025eko abenduak 19
Donostiako Campusa
Deustuko Unibertsitatearen Donostiako campusak 14 ikastetxetako DBHko 3. eta 4. mailako 740 ikasle gipuzkoar hartu zituen abenduaren 15etik 19ra, Ingeniaritza Fakultateak, Doplayrekin elkarlanean antolatutako teknologia tailerretan parte hartzeko. Tailerrek STEAM bokazioak eta, bereziki, teknologiako bokazioak sustatzea dute helburu eta, horrekin batera, DBHko azken mailetako ikasleei aukera ematen diete gaitasun digitalak garatzeko, sormena eta berrikuntza sustatzeko, “learning by doing” ikaskuntza praktikoa eta talde lana bultzatzeko eta sortzen ari diren teknologia berrietara hurbiltzeko.
Ikasleek hainbat tailerretan parte hartzeko aukera izan dute, taldeka. Esate baterako, "Smart City Challenge: eraiki zure hiri adimenduna mikrobitekin” tailerrean, Iratxe Menchaca Hezkuntza eta Kirol Fakultateko irakaslearen eskutik, ikasleek ezagutu ahal izan dute hiri modernoek nola erabiltzen dituzten datuak erabakiak hartzeko, nola biltegiratzen diren gure erregistroak hodeian eta nola eman lehen urratsak hiriko bizitzari aplikatutako adimen artifizialerako bidean. Gainerako tailerrak, Doplayk diseinatu eta dinamizatuak, honako hauek izan ziren: “3D modelatzea eta animazioa Blenderrekin”, Minecraft pertsonaia bat urratsez urrats sortzeko eta animatzeko; “Robotikako proiektua: Sortu zure abentura EV3rekin ”, ikasleek Lego Mindstorms robot bat eraikitzeko eta istorio interaktibo bat diseinatzeko; “MakeCode Arcade bideojokoaren diseinua”, harrapaketako bideojoko bat diseinatzeko, gero kontsola fisiko batean jokatu ahal izateko; “Esperimentatu errealitate birtualeko betaurrekoekin”, errusiar mendian ibiltzeko, nabigatzeko, boleibolean aritzeko, itsasoan arraun egiteko edo Beat Saberrekin aritzeko; eta, azkenik, “Errealitate areagotua: museo birtuala”, ikasleek, galdesorten eta eduki sortzailearen bidez, museo interaktibo bat diseinatzeko.
