2026ko urtarrilak 20
Bilbao
Deustuko Unibertsitateak Eba Gaminde Merkataritza Zuzenbideko irakasle titularra izendatu du unibertsitateko aldezle eta Joxin Etxezarretaren lekukoa hartu du. Etxezarretak amaitu du erakundean izan duen etapa; 2017ko urriaren 1etik orain arte bete du kargu hori. Izendapen horrekin, Unibertsitateak jarraipena ematen dio unibertsitateko bizitzarako sendoa eta funtsezkoa den figura garrantzitsu horri, unibertsitateko elkarteko kide guztientzako bitartekotza eta entzuteko kanal inpartziala izateko sortu baitzen.
Aldezle berriak ibilbide luzea du Unibertsitatean, 1997-98 ikasturteaz geroztik Enpresa Zuzenbideko, Sozietateen Zuzenbideko eta Merkataritzako Kontratazioaren Zuzenbideko irakasgaietan irakasten baitu euskaraz. Zuzenbide Kooperatiboa du ikerketa esparru zehatza. Hain zuzen ere, gai horri buruz egin zuen doktoregoko tesia. LEGEKINBERRI: ekimen juridiko berritzaileak eta gobernantza demokratikoa gizarte bidezko, inklusibo eta jasangarrirako ikertaldeko kidea da.
Bere lan profesional guztia bizitzako bi gai handiri lotuta eman du: Zuzenbideari eta euskarari. Hizkuntza horretan idatzi ditu bere artikulu eta argitalpen guztiak, eta horrek, 2022an, Euskaltzaindiko euskaltzain urgazle izendatzea ekarri zion. Gainera, bake-epailea da Mungian 2012tik, eta lan horri esker entzute, adiskidetze eta bitartekotzarekiko sentsibilitate berezia garatu ahal izan du.
Atea beti zabalik
Eba Gamindek esker ona sentitzen du berarengan jarritako konfiantzagatik, eta erantzukizuna "apaltasunez, ilusioz eta konpromisoz" hartu du. Unibertsitateko elkartearen zerbitzura jartzea ohorea dela uste du, eta bere atea "beti zabalik" egongo dela azpimarratu du orientabidea eta begirada inpartziala behar dutenentzat. Unibertsitateak "ahots guztiak errespetuz entzun ahal izateko eta elkarrizketa bitarteko dela, bidezko irtenbideak sustatzeko gunea" izaten jarraitu dezan lagundu nahi du. Uste osoa du gatazkak eta kezkak konpontzeko eta unibertsitateko bizitza hobetzeko elkarrizketak duen gaitasunean, eta konpromisoa hartzen du beti “justiziak, gardentasunak eta gure elkartearekiko errespetuak” gidatuta jarduteko. Ildo horretatik, “entzutea, azaltzea eta laguntzea” izango dira beti bere lanaren zutabeak.
