2025eko abenduak 03
Bilboko Campusa Donostiako Campusa
Deustuko Unibertsitateak, abenduaren 3an, Euskararen Nazioarteko Eguna ospatu zuen, Bilboko eta Donostiako campusetan, unibertsitatearen barruan eta kanpoan euskararen erabilera biziarazteko eta partekatzeko diseinatutako programa zabal baten bidez. “Euskara, bihotzetik ahora” lelopean, bihotzeko hizkuntza ahora eraman eta mundura zabaltzea izan zen jardunaldiaren helburua.
Deustuko Unibertsitatean euskara ez da hizkuntza bat bakarrik: identitatea, kultura eta komunitatea lotzen dituen hari bizia da. Sentimendu sakon eta sustraitua sortu eta etxeetan, kaleetan eta lagunartean hazten da, eta benetako forma hartzen du esaera zahar, bertso, elkarrizketa edo podkast baten bidez adieraztean. Zenbat eta gehiago erabili, orduan eta gehiago partekatzen da eta gehiago entzuten da, orduan eta biziago mantentzen da.
San Frantzisko Xabierkoaren eguna ere bada, santu nafar eta euskararen zaindariarena. Ama hizkuntza, hain zuzen, euskara zuen. Haren ereduak gogorarazten digu bihotzetik sortzen denak baduela indarra hedatzeko: euskara ere kontuz gordetzen den altxorra da, eta eskuzabaltasunez zabaldu dakioke nahi duen guztiari.
Horregatik, unibertsitateko elkarte osoa —ikasleak, irakasleak, langileak, ikasle ohiak, familiak eta lagunak— gonbidatuta egon zen abenduaren 3rako programatutako jardueretan parte hartzera. Programak egunean zehar formatu desberdinetan hizkuntzaz gozatzeko proposamenak jaso zituen: atsotitzen lehiaketa, bertso-saioa - Andoni Egaña eta Ane Labarka izan ziren Bilbon eta Julen Olaizola eta Emaitz Murua Donostian-, Abendualdiko otoitza bakearen alde eta San Frantzisko Xabierkoaren alde eta podkasta zuzenean.
Horrela, euskara bihotzetik ahora eraman eta denen artean partekatu eta gozatu ahal izan zuten. mundua indartsu, alaitasunez eta benetakotasunez lotu, konektatu eta zabaldu dezakeen hizkuntza bizia ospatuz.
Unibertsitateen funtsezko zeregina
Aurten, ospakizun hori bat egin zuen euskal unibertsitate-sistemako lau unibertsitateek sinatutako “Unibertsitateok euskararen indargune izan gaitezen” manifestu bateratuarekin: Deustuko Unibertsitateak, EHUk, Mondragon Unibertsitateak eta Nafarroako Unibertsitateak (Euneiz) bat egin zuten. Dokumentuak goi-mailako hezkuntzako erakundeek euskararen transmisioan, erabileran eta garapenean duten funtsezko zeregina aldarrikatzen du, eta azken hamarkadetan euskarak presentzian, prestigioan eta gaitasun akademikoan aurrera egitea ahalbidetu duen ahalegin kolektiboa aitortzen du.
Era berean, egun hori aprobetxatu zuen Deustuko Unibertsitateak eta bat egin zuen Batuz Aldatu ekimenarekin ere. Euskalgintzaren Kontseiluak sustatutako ekimena izan zen, eta euskararen erabilera eta ezagutzaren normalizazioa bermatuko duten hizkuntza-politikak sustatzea izan zuen helburu. Atxikimendu horrekin, Unibertsitateak bat egin zuen itun soziopolitiko berri hau babesten duten hainbat sektoretako ehun gizarte-eragilek baino gehiagok osatutako sarearekin, hizkuntza-politiken eremuan. Ekimen hori euskararen normalizazioa agenda sozial eta politikoaren erdigunean jartzera bideratutako ibilbide-orri gisa aurkeztu zen, hizkuntzaren etorkizuna bermatzeko beharrezko oinarriak ezartzeko, betiere gizartearen adostasunetik abiatuta.
Urrats hori lerrokatuta etorri zen Deustuko Unibertsitatearen 2025-2030 aldirako Hizkuntza Politikako Plan Gidariarekin, unibertsitate hirueledunerantz aurrera egitea eta euskara bizitza akademikoan, campusean eta komunikazio instituzionalean eraginkortasunez txertatzea baitu helburu. Planak helburu eta ekintza zehatzak ezartzen ditu jakintza-arlo guztietan euskara normalizatzen laguntzeko, unibertsitateko elkartearen hizkuntza-gaitasunak indartzeko eta barruko eta kanpoko komunikazioetan bi hizkuntza ofizialen erabilera bermatzeko.
