2026ko uztailak 06
Donostia-San Sebastián
Deustuko Unibertsitatearen Donostiako campusean egingo da uztailaren 6an eta 7an Giza Eskubideen erronka berriei buruzko Nazioarteko V. Biltzarra (V CINDHU), Zuzenbide Fakultateak eta IBEROJUR-Ikasketa Juridikoen Iberoamerikako Institutuak antolatuta, formatu hibridoan (aurrez aurre eta online).
Giza Eskubideak funtsezko oinarria dira gizarte bidezkoak, demokratikoak eta inklusiboak eraikitzeko. Gizarte, politika, teknologia eta ingurumen arloetako eraldaketa azkarrak ezaugarri dituen mundu honetan, funtsezkoa da elkarrizketarako eta hausnarketarako guneak bultzatzea, lortutako aurrerapenak eta oraindik dauden oztopoak ikuspegi kritikotik aztertu ahal izateko. Testuinguru horretan, V. CINDHU batzarraren helburua da giza eskubideen askotariko dimentsioei buruzko hausnarketa sustatzea, ikertzaileen, profesionalen, aktibisten eta gizarte zibilaren artean jakiteak, esperientziak eta ikuspegiak trukatzeko ingurune pluralean.
Biltzarrak garrantzia hartzen ari diren hainbat gairen inguruan eztabaidatzea proposatzen du: egiturazko desberdintasunak, migrazioak, krisi humanitarioak, teknologia berrien eragina, klima aldaketa, eta pertsonaren duintasunaren defentsa ingurune ezegonkorretan, besteak beste. Arazoak identifikatzeaz gainera, topaketak irtenbideak bilatu, lankidetza sareak indartu eta Giza Eskubideak sustatzeko, babesteko eta eraginkor bihurtzeko konpromiso kolektiboa berretsi nahi du, eskualdean, Europar Batasunean eta mundu globalean.
Jon López Gorostidi eta Elena Atienza Macías Deustuko Unibertsitateko Zuzenbide Fakultateko irakasleak izango dira biltzarraren koordinatzaileak. Horiekin elkarlanean arituko dira biltzarraren batzorde antolatzaileko eta batzorde zientifikoko kideak: Beatriz Pérez de las Heras, Inmaculada Herbosa Martínez, Aitziber Emaldi Cirión, Emilio José Armaza Armaza, David Fernández Rojo, Natale Serón Arizmendi, Estela Brión Berdote, Xabier Ezeizabarrena Sáenz, Raquel Arias Benéitez, Garazi Romero Sánchez, Eduardo Pardo Bazán eta Iratxo Gorostiza Etxeberria, guztiak Deustuko Unibertsitateko Zuzenbide Fakultateko irakasleak.
