Enplegu eta Ekintzailetza Foroa urteroko topagunea da, enpresa, profesional, unibertsitate eta ikasle eta tituludunentzat. Elkar ezagutzeko espazioa da eta leiho ezin hobea enplegu bila ari diren ikasleek lanean hasteko aukera izan dezaten enplegu emaileen eskutik. Enpleguarekin duten topagune horretan, azken mailetako ikasleek eta tituludunek curriculumak eman ditzakete, laneko elkarrizketak izan ditzakete eta erakundeetan zer profil eskatzen duten jakin, etorkizuneko lanbidearekin lotutako jarduera eta topaketetan parte hartzeko aukera izateaz gain.
Foroan sektore guztietako ordezkariak egoten dira: bankuak, automozioa, ingeniaritzak, enpresa teknologikoak, aholkularitzak edo gizarte esparruko eta hirugarren sektoreko enpresak, besteak beste. Azken urteotan, pandemia dela eta, Foroa formatu birtualean izan da. Horri esker, parte hartu duen enpresa kopurua eta izena eman duen ikasle kopurua asko hazi da.
Foroa Deustuko Unibertsitatearen estrategia global baten barruan sartuta dago. Horrela, Unibertsitateak bidelagun funtzioa betetzen du tituludunen lanbideko bizitzan eta lan merkatuarekiko harremanean. Izan ere, Deusturentzat “gazteen enplegua lehentasuna da”. Horregatik, urtero, tituludunak lan merkatuan txertatzea hobetzeko eta errazteko jarduerak sendotzen ditu.