Guztira 12.000 m 2 -ko azalerako eraikin honek –ia erdia sestra azpitik– Deustuko Unibertsitateak jakintza arlo berrien alde egin duen apustuari erantzuten dio. Eraikinak Donostiako campusari instalazio modernoak emango dizkio irakaskuntza eta ikerketa jarduera garatzeko, unibertsitatearen eraldaketa digitala erraztuko du, campuseko bizitza sendotuko du, eta gizartearekiko harremanetan zedarri izango da, elkarlanerako aukera berriak ekarriko baititu.

Larramendi eraikinak campusari egiten dion ekarpena hiru ardatzen inguruan egituratzen da.
Hain zuzen ere, ardatz bakoitzak eraikinaren zati bat hartzen du::

• Ikasteko eta Ikertzeko Baliabideen Zentro-IIBZ moderno bat, liburutegiko azpiegitura eta ekipamendu berriak dituena.
• Ikasgela eta irakaskuntzako ekipamendu berriak, titulazio berrien beharrei erantzuteko.
• Kirol instalazioak eta punta-puntako laborategiak, Fisioterapiako eta Jarduera Fisikoaren eta Kirolaren Zientzietako titulazioek edo etorkizuneko beste zenbaitek sortu dituzten beharrei aurre egiteko.

Hiru ardatz horiez gainera, eraikinak espazio berriak ekarriko ditu elkarrekin egoteko eta askotariko erabileretarako –erakusketa eremua, terraza, etab., eta, horien artean, Foro aretoa–, dimentsio ertaineko jarduerak eta ekitaldiak antolatzeko. Azpiegitura horiek unibertsitateari aukera emango diote bere proiekzio publikoa indartzeko eta gizarteko eragileekin elkarlanean aritzeko.

Liburutegia Unibertsitatearen funtsezko zatietako bat da, ikerketa eta irakaskuntzako jarduerei laguntzen baitie. Funts bibliografikoak eta dokumentalak hautatu, prozesatu, gorde eta zabaltzea du zeregin nagusi, baita unibertsitateko elkarteari beste liburutegi eta dokumentazio zentro batzuetatik datorren informazioa eskuratzeko aukera ematea ere.

Unibertsitate Liburutegiaren-IIBZ kontzeptu berri hau gizartearen zerbitzura dago eta helburu hauek lortu nahi ditu:

• Ikasteko eta Ikertzeko Baliabideen Zentroa izatea (IIBZ). Ikuspegi horretara hurbiltzen ari dira unibertsitateko liburutegiak eta horrek barne hartzen ditu liburutegiko eta hemerotekako ohiko zerbitzuak, informazioaren eta komunikazioaren teknologien abantailak, eta zerbitzu interaktibo berriak.
• Unibertsitateko elkartearen eta ikertzaileen gaur egungo beharrei erantzutea, Deustuko Hezkuntza Ereduaren garapenari lagunduz. Eredua gogoeta luze baten ondorio da eta ikerketak, banakako lanak eta ikaskuntza aktibo eta sortzaileak gaur egungo gizartean duten garrantziaren isla da.
• -Erabiltzaileei –protagonista nagusiak– jakintza garatzeko, transmititzeko eta sortzeko prozesuetan modu proaktiboan laguntzea, gogoeta eta sormenerako espazio berriak eskainiz.
• Baliabide berriak sortzea, eskuragarri dauden bitartekoak zabaltzea eta Espainiako eta nazioarteko beste zentro batzuekiko harremanak areagotzea. Zentro berriak zerbitzu eta instalazioen azalera handitzeaz gainera, nazioarteko lankidetza ere indartu nahi du, erabiltzaileen eskura ahalik eta informaziorik gehien eta ahalik eta azkarren jarriz, eta konektagarritasun globala erraztuz.
• Berrikuntza eta sormeneko testuinguru bat garatzea, askotariko aukerak eskaintzen dituzten espazio eta instalazioetan: lan autonomoa eta taldekoa; presentziala eta sarekoa; kanal bakarrekoa eta formatu askotakoa; oinarrizko informazioarekin eta informazio espezializatuarekin.
• Unibertsitatearen eta enpresaren arteko lotura bultzatzea, enpresei aukera emanez barne eta kanpoko datu iturri eta analisiak eskuratzeko, enpresenak eta merkatuenak; parte hartzeko, ideiak sortzeko eta proiektuak garatzeko espazioak sortuz eta bertan antolatuz enpresa eta gizarte intereseko topaketak, eztabaidak, foroak, hitzaldiak, etab.
• Jakintzarekiko eta kulturarekiko interes kolektiboa sustatzea, norberaren hazkunderako tresna gisa eta gizarte osoari transmititu eta eskaini behar zaion gizarte balio gisa, gizartearen eskura jarriz Euskal Herriaren kanpo proiekzioa indartzen lagunduko duen kultur azpiegitura berri bat.

Donostiako campuseko IIBZk azken belaunaldiko liburutegi baten zerbitzuak eskaintzen ditu:

• Funtsak: 20.000 liburu edonork eskuratzeko eta 140.000 liburu gordailuan.
• Ikasteko aretoak (banakako 220 toki), irakurketakoak, prestakuntzakoak eta erakusketetakoak.
• Talde lanerako aretoak (21).
• Atsedenerako eremua.
• Bulegoak eta laguntza zerbitzuak.
• Zirkulazio eta informazio mahaia.
• Ikertzaileentzako espazioa, lanerako eta bileretako gelak dituena. 

Donostiako campuseko prestakuntza eskaintza zabaltzeak eta jakintza arlo berrietara irekitzeak irakaskuntzako azpiegitura eta ekipamendu berrien beharra ekarri du. 2013-2014 ikasturteaz geroztik, campusean gradu eta titulu bikoitz berri hauek eskaintzen dira: Zuzenbidea + Komunikazioa (2014-2015), Gizarte Hezkuntza + Gizarte Lana (2015-2016), Lehen Hezkuntza: Entzumena eta Mintzaira eta Kirol Hezkuntza aipamenak (2013-2014), Enpresen Administrazio eta Zuzendaritza + International Management Skills (2014-2015), Enpresen Administrazio eta Zuzendaritza + Digital Business Skills (2017-2018), Lehen Hezkuntza + Jarduera Fisikoaren eta Kirolaren Zientziak (2014-2015), Fisioterapia (2020-2021), Fisioterapia + Jarduera Fisikoaren eta Kirolaren Zientziak (2020-2021). Larramendi eraikineko 13 ikasgela berriek guztira 1.000 ikasle hartu ahal izango dituzte eta ikasketa berri horien beharrak estaltzeko aukera emango dute. Bereziki, ikasgela horietan ikasiko dute Fisioterapiako eta Jarduera Fisikoaren eta Kirolaren Zientzietako arloko ikasleek, gaur egun maila bakoitzeko 120.

Ohiko irakaskuntza jardunerako ikasgelez gainera, Larramendi eraikinak campuseko bizitzarako beste espazio batzuk ere eskaintzen ditu. Aparteko aipamena merezi du Foro aretoak: espazio moldaerraza, altzari mugikorrak dituena, soinu eta pantaila digitalez hornitua, tamaina ertaineko –200 pertsona inguru– prestakuntza, gizarte eta erakunde ekitaldiak hartzeko, askotariko formatuetan.

Donostiako campuseko Fisioterapiako eta Jarduera Fisikoaren eta Kirolaren Zientzietako titulazio berriak Deustuko Unibertsitateak bere hezkuntza eskaintza beste jakintza eta jarduera esparru batzuetara zabaltzeko egin duen apustuaren ondorio dira, kasu honetan, Osasunaren eta jarduera fisikoaren etorkizun handiko esparruan. Behar berri horiei erantzuteko, Larramendi eraikinak ekipamendu modernoko instalazioak ditu, prestakuntza metodologia berritzaileak erabiltzeko.

• Ospitale birtuala, kontsulta eremua, gimnasio terapeutikoa, ospitalizazio eremua eta ZIU-Zainketa Intentsiboko Unitatea dituena.
• Biomekanikako eta Neurozientzietako, Fisiologiako, eta Anatomia eta Natur Zientzietako laborategiak.
• Ikasgela teoriko-praktikoak, tresna espezializatuez hornituak.
• Hainbat mota eta dimentsiotako gimnasioak: jarduera fisikoetarako, tatami gimnasioa eta fitness eremua.
• Kiroldegia: kirol kantxa zabala, harmailak eta bestelako zerbitzu osagarriak ere badituena.

Laburbilduz, eraikin berrian honela banatzen dira azpiegiturak, ekipamenduak eta zerbitzuak, solairuz solairu:

• Sotoko -2. solairua
  • Liburutegiko gordailua.
  • Garajea: 57 toki.
• Sotoko -1. solairua
  • Irakasleen gela.
  • Lau ikasgela teoriko-praktiko.
  • Biomekanikako eta Neurozientzietako laborategia.
  • Fisiologiako laborategia.
  • Anatomiako eta Natur Zientzietako laborategia.
  • Lau kontsulta.
  • Ospitale birtuala eta simulazio eremua: ospitalizazio eremua eta ZIU-Zainketa Intentsiboko Unitatea.
  • Gimnasioa.
  • Tatami gimnasioa.
  • Ariketa terapeutikoetarako gimnasioa.
  • Fitness.
  • Aldagelak.
• 0. solairua: Ikasgelategia.
  • 13 ikasgela.
  • Armairuak.
  • Foro Aretoa.
• 1. solairua: Liburutegia - IIBZ.
  • Edonork hartzeko bilduma.
  • Ikasteko aretoa, banaka lan egiteko 220 toki dituena.
  • Talde lanerako 21 areto.
  • Irakurketa aretoa.
  • Erakusketa aretoa.
  • Liburutegiko zerbitzuak.
• 2. solairua
  • Liburutegia: ikertzaileentzako aretoa.
  • Liburutegia: bilera gela.
  • Kirol kantxa.
  • Terraza.