Web gune honek bere cookiak eta bitartekoenak erabiltzen ditu zure nabigazioa optimizatzeko, zure lehentasunetara egokitzeko eta jarduera analitikoak egiteko. Nabigatzen jarraitu ez gero, gure Cookien Politika onartzen duzu.

Onartu
2019ko maiatzak 23Bilboko Campusa

Teknologien arloko 100 profesionalek baino gehiagok aztertu dituzte CRUE IKT jardunaldietan teknologia berriek zelako erronka etikoak planteatzen dituzten

Maiatzaren 23an eta 24an, CRUE-IKT jardunaldien 39. edizioa hartu zuen Deustuko Unibertsitateak. Aurtengo lema hauxe izan da: “Informazioaren teknologietako profesionalak teknologia berrien erronka etikoen aurrean”. Teknologien arloko 100 arduradunek baino gehiagok hartu zuten parte topaketa horretan. Adimen artifizialeko, aldaketa digital eta etikoen arloko adituen ponentziak; enpresa berritzaileen aurkezpenak, eta gizarte egitarau zabala izan zuten bertaratuek Bilbo eta inguruak ezagutzeko.


Adimen artifizialak eta haren aplikazio eremu guztiek (boot-ak, aholkulari birtualak, simulatzaileak, etab.) datuen babeseko eta segurtasuneko lege arloko betekizunak ez ezik, etika arloko eskakizun garrantzizkoak hartu beharko lituzkete kontuan, diseinuaren etapatik hasita. Kontu hori gogoan ez hartzeak ekarriko luke sistema horiek jasotako informazioari erabilera interesatua ematea edo plataforma horiek ematen dituzten erantzunak, ekimenak edo gomendioak manipulatzea.


Teknologietako profesionalak bidegurutze horretan daude, sistema horiek eraiki eta zabaltzea beren erantzukizunen artean jartzen baita. Eta hala, profesionalak giltzarri bihurtzen dira balio etikoak zaintzeko orduan, produktu edo zerbitzu horiek merkatura irten aurretik. CRUE IKT jardunaldietan parte hartu zutenek puntarengo garrantzia duten gai horien inguruko ikuspegi desberdinak aztertu zituzten.


Egitaraua


Jardunaldiak maiatzaren 23an hasi ziren saio tekniko batekin. Teknologia berrien erronka etikoak jorratu ziren eta inguru teknologikoko negozio arduratsuari buruzko ponentzia bat ere aurkeztu zen. Bileraren hasiera ofiziala 15:45ean izan zen Paraninfoan eta parte hartzaileak hauek izan dira: Juan Gómez, CRUE-IKTko presidentea eta Jaeneko Unibertsitateko errektorea; José María Guibert, Deustuko Unibertsitateko errektorea; eta Luis Hernández, CRUE-IKTko idazkari nagusia. Gainera, Roberto San Salvadorrek, Deusto Cities Lab Katedrako zuzendariak, “La transformación de Bilbao y su futuro en el marco de las Smart cities” hitzaldia eskaini zuen.


Maiatzaren 24ko jardunaldiaren hasieran Deusturen Giza Eskubideak Ingurune Digitaletan adierazpena aurkeztu zen. Ondoren, “Seis principios éticos para el desarrollo de la inteligencia artificial” ponentzia eskaini zuen Alberto Marcosek, Microsoften Unibertsitateko arduradunak. Natalia Estebanek, Rey Juan Carlos Unibertsitateko Hezkuntza Digitaleko Berrikuntzako Zentroko koordinatzaileak, FOLTE (Formación On-line y Tecnologías Educativas) lan-taldeko txostena eman zuen ezagutzera, eta Helena Matutek, Deustuko Psikologia esperimentaleko irakasleak eta gizakien eta adimen artifizialaren arteko interakzioetako adituak, gai hau jorratu zuen: “Psicología e inteligencia artificial: cuestión de ética”.


“Estrategia española en I+D+I en Inteligencia Artificial” aztertu zuen Óscar Crdónek, Granadako Unibertsitateko Unibertsitate Digitalerako errektorearen eskuordeak; Lluis Alfons Ariñok, Rovira i Virgili Unibertsitatekoak, bere aldetik, “CRUE-TIC y blockchain: una apuesta innovadora” eskaini zuen. Jardunaldietan, emakumeen artean bokazio zientifikoak eta teknologikoak sustatzeko programa (Inspira Steam) ere ezagutzera eman zen.


Ekintzailetzako ekimenen aurkezpena


Aurtengo CRUE IKT jardunaldietan bi berrikuntza egon ziren. Alde batetik, tailer parte hartzaileak antolatzea, jardunaldietako gaiaren ildoko erronkak ebaztera bideratuak; eta, bestetik, unibertsitate inguruko oinarri teknologikoko startup-etan garatu diren pare bat enpresa ekimen hurbil-hurbiletik ezagutzea.


Gizarte atalean, jardunaldietako parte hartzaileek Bilboko eraldaketaren gakoak ezagutu zituzten, Bilboko Udala bisitatu zuten eta itsasadarrean nabigatzeko aukera izan zuten, hiriaren berrikuntza prozesuaren hastapenetako ardatza, hain zuzen. Gastronomiak ere izan zuen bere atala jardunaldietan, Bizkaiko bi espazio naturaletan egin ziren ibilaldiek bezala: Getxo eta Sopelako itsaslabarretakoak eta Urkiolako Parke Naturalean egindakoak.


Argibide gehiago: www.cruetic.deusto.es

23/05/2019 - 24/05/2019 - Jornadas CRUE-TIC: Los profesionales de TI ante los desafíos éticos que plantean las nuevas tecnologías